Изложување на минатото – музеолошкиот пејзаж во Западен Балкан и справувањето со минатото

21-то издание на Балкански.перспективи е фокусирано на музеолошкиот пејзаж во Босна и Херцеговина, Косово, Северна Македонија и Србија. Целта на ова издание е да поттикне дискусија за соодветните култури на сеќавање на насилното распаѓање на Југославија и нивното претставување во музеите во регионот. Статиите и поткастите детално ги разгледуваат музеите како места за сеќавање, меморализација и справување со минатото. Меѓутоа, музеите се дел од дискурзивното создавање на историјата и со тоа претставуваат места на меморија и создавање историја. Музеите не се неутрални и не ја одразуваат објективната реалност, туку се и агенти во динамичниот збир на процеси во контекст на градењето на нациите, оспоруваните истории и соодветните наративи. Затоа, преку ова издание  авторите и поткастите даваат свој придонес кон критичните и различните перспективи и пристапи за улогата и функцијата на музеите во регионот во контекст на справувањето со минатото.

[expander_maker id=”2″ more=”Read more” less=”Read less”]

Оттука, ова издание собира различни ставови за музеите и справувањето со минатото во Западен Балкан: придонесот на Мелина Садиковиќ од Босна и Херцеговина ги опишува врските помеѓу сеќавањето, времето и местото и ја поставува рамката за написот на историчарката Елма Хашимбеговиќ. Г-ѓа Хашимбеговиќ во својата статија зборува за (не)моќта на музеите како општествени актери за позитивни промени во Босна и Херцеговина. Придонесите на Косово за ова издание вклучуваат напис од Шкелзен Гаши, кој го посети музејот во сеќавање на масакрот врз семејството Бериша во Сува Река (Сухарека) и со тоа го разгледува музејскиот пејзаж на Косово. На другата страна, Нита Луси и Линда Гусија ја презентираат својата работа со Семејната училишна куќа „Хертика“ и нивниот проект за музеј на виртуелна реалност во просториите на паралелниот училиштен систем во Косово. Ивана Хаџиевска од Северна Македонија во својата статија зборува за македонскиот музеолошки пејзаж и практичните прашања. Од Србија, ова издание на Балкански.перспективи ја содржи статијата на Ана Кнежевиќ за работата на Музејот на африканска уметност во Белград и периодот од 1990-тите. Во својот придонес Нела Тонковиќ ги анализира предизвиците со кои се соочува основањето на Меморијалниот центар „Старо Сајмиште“ во Белград.

Ова издание вклучува и нова серија на поткасти на Балкански.перспективи. Како и обично, можете да ги слушате и преземате поткастите преку нашата веб-страница www.dwp-balkan.org или преку претпочитаната услуга за стриминг како Spotify, Google Podcast или Apple Podcast. Би сакале да им се заблагодариме на нашите партнери, продукцискиот тим зад и пред микрофоните и нашите гости кои придонесоа за поткастите. Во Босна и Херцеговина им благодариме на Ослобоѓење КУН, Ѓорѓе Крајишник, Младен Бањц и Елма Хоџиќ. Во Косово им благодариме на ТИЛЛТ Радио, Аулоне Кадриу и Нора Прекази. Во Северна Македонија им благодариме на Радио МОФ и Благоја Варошанец. Во Србија им благодариме на радиоемисијата Женергија на Радио Апарат.

Уредничкиот тим на Балкански.перспективи ви посакува пријатни мигови со статиите, анализите и поткастите.

Во име на уредничкиот тим
Александар Војвода
Главен и одговорен уредник

[/expander_maker]