Поп културата и соочување со минатото

Ова издание на списанието Балкански.перспективи преиспитува една широка и разновидна област: поп-културата и справувањето со минатото во земјите од Западен Балкан. Од една страна, ова издание ги образложува манифестираните и латентните врски помеѓу поп-културата, нејзините различни производи и нејзините актери низ различни периоди, различните полиња на справувањето со минатото и војните во регионот на Западен Балкан во 1990-тите и раните 2000-ти. Така, уредничкиот тим признава дека поп-културата обезбедуваше – и во одредени контексти сè уште обезбедува – платформа за нормализирање на националистичките, едностраните и авторитарни идеологии и амбивалентно во исто време нè поврзува преку заедничката музика, театарската игра, филмовите или ТВ сериите.

[expander_maker id=”2″ more=”Read more” less=”Read less”]

Весна Андрее Заимовиќ за ова издание пишува: „Мјузикл (иако, статиите во ова издание на Балкански.перспективи опфаќаат и други производи на поп-културата) афинитетот е моќно средство за идентификување и поврзување со колективот. Културните производи често се користат за да се потврди припадноста на една нација како масовен колектив што силно се промовира во земјите коишто се појавија по распадот на Југославија“.

Од друга страна, ова издание вклучува размислувања за тоа како поп-културата овозможува навраќање кон лузните што насилното распаѓање на Југославија му ги нанесе на регионот на индивидуално и на колективно ниво. Во својот придонес, Аурела Кадриу го парафразира Бертолд Брехт: „Во мрачни времиња им пееме на мрачните времиња“. Оттука, бараме со овој зборник од дискусии, статии, интервјуа и поткасти да разбереме како сегашните формати на забава, културни референци, пеење и шега се длабоко вградени во траумите на тие мрачни времиња. Во исто време, поп-производите може да обезбедат простор за дискусија и увид во една мирна заедничка иднина преку спротивставување на новите авторитарни, реверзионистички и националистички тенденции во регионот.

Среќни сме што можеме да ве поканиме да го истражите 23-тото издание на списанието Балкански.перспективи за поп-културата и справувањето со минатото во Западен Балкан. Од Босна и Херцеговина, Мирза Скендерагиќ пишува како филмовите се дел од процесот на справување со минатото, додека Весна Андрее Заимовиќ го разгледува музичкиот жанр „домашна музика“ и како таа е претставена на интернет-сервисите како Spotify и YouTube. Прилозите од Косово вклучуваат интервју на Љатиф Мустафа со Шкељзен Малиќи – вториот беше куратор на изложбата „Отаде“ во 1997 година во Белград, која ја претставува современата уметност од Косово. Аурела Кадриу во својата статија пишува за влијанието кое самостојната продукциска куќа ЛАБИА го има врз актуелните формати на забава во Косово. Од Северна Македонија имаме две статии кои се занимаваат со перцепциите и предрасуди во контекст на ТВ, музика, театар и кинематографија. Во интервјуто со Драгана Гунин, разговараме за прашања во врска со предрасудите од минатото преку ТВ, театар и музика. Тони Цифровски пишува за прашањето за сексуалната различност во Северна Македонија и за тоа како се разговара за родовите улоги во македонската поп-културна индустрија. Од Србија имаме придонес од Милена Квапил која зборува за југословенските ТВ серии и нивната перцепција во постјугословенско време. Томислав Марковиќ зборува за песната „Нема ни 12 часот“ (Tek je dvanaest sati) на танцовата група ЕТ (Електро тим) од Загреб и како таа стана хит во Србија во 1993 година.

Имаме и нова серија на поткасти на Балкански.перспективи за вас. Како и обично, можете да ги слушате и преземате поткастите преку нашата веб-страница www.dwp-balkan.org или преку претпочитаната услуга за стриминг како Spotify, Google Podcast или Apple Podcast. Би сакале да им се заблагодариме на нашите партнери, продукцискиот тим зад и пред микрофоните и нашите гости кои придонесоа на поткастите. Во Босна и Херцеговина им благодариме на Ѓорѓе Крајишник, Марија Симаниќ Арнаутовиќ и Минел Абаз. Во Косово им благодариме на Љатиф Мустафа од Сбункер и на Шкељзен Малиќи. Во Северна Македонија им благодариме на Радио МОФ и на Бујар Лума. Во Србија им благодариме на „Лице улице“ (Liceulice) и на Бојан Марјановиќ, како и на Милена Квапил.

Редакцијата на Балкански.перспективи ви посакува пријатно искуство со читање и слушање.

Во име на уредничкиот тим на Балкански.перспективи.

Александар Војвода

главен и одговорен уредник

[/expander_maker]