Онлајн-просторот ги руши многуте бариери до информациите, со што ни дава пристап и до факти и до дезинформации, при што истовремено ни овозможува да ги споделиме, без оглед на физичките граници кои нѐ одделуваат. Ова на сите нас ни дава моќ да ги провериме нашите извори на вести, да ги провериме фактите и меѓусебно да се проверуваме. Секако, оваа голема слобода која ни е дадена за да се изразиме е поврзана со одговорноста за меѓусебно следење. Постои одредена анонимност кога станува збор за онлајн-коментарите, која исто така може да се злоупотреби преку искажување навреди и изразување на нашата болка преку обвинување и засрамување на другите, преку негирање на воените злосторства и, на тој начин, негирање на нашите сопствени чувства на вина со самото поистоветување, како и преку постојано потворување на реториката на „ние“ и „вие“. Тоа значи дека, иако го имаме овој голем извор во реално време, можеме да избереме да го искористиме за критичка анализа на минатото, за проверка на фактите и за продлабочување на знаењето или, пак, можеме да го искористиме за да ги поттикнеме демагошките агенди и да продолжиме да ги продлабочуваме поделбите и недовербата меѓу нас. Имајќи го тоа предвид, онлајн-справувањето со минатото  е неизвесна задача.

Линијата помеѓу самоизразувањето и споделувањето на демагогии е тенка. Во ова издание на Балкански.Перспективи, авторите кои дадоа свој придонес од целиот Западен Балкан истакнуваат како се менува и се изобличува оваа линија.  Белма Буjубашиќ, Беснике Салиху, Фахри Хисени, Фитим Гаши, Јована Прусина, Катерина Смилева, Срѓан Пухало и Владан Џукановиќ, доаѓаат од новинарството, академските кругови, правото и граѓанското општество, и иако пишуваат од различни контексти, сепак тие се усогласени во однос на многу аспекти.

За крај, 14-тото издание на Балкански.Перспективи под наслов „Како да се соочиме со минатото во време на дигитализација? Западиот Балкан е онлајн.“, всушност е нашето прво целосно интернет-издание. Отсега, сите изданија на списанието ќе бидат презентирани само во дигитална форма, и ќе бидат достапни на DwP-Balkan.org.

Се надеваме дека статиите од ова издание на Балкански.Перспективи, ќе ве натераат да размислувате и ќе ве заинтересираат. Како и секогаш, вашите коментари се добредојдени –испратете ни ги по е-пошта: balkan.perspectives@forumzfd.de.

Чувајте се во овие дестабилизирачки времиња,

Ванеса Робинсон-Конлон / главен уредник