Çfarë ka mbetur pa përfunduar në historinë tënde? Na shkruaj.

Lufta, tirania dhe zhvendosja shkatërrojnë jetë dhe komunitete. Ndonjëherë nuk i shkatërrojnë plotësisht, por i lënë në gjysmë. Urgjenca, frika dhe mbijetesa i lënë gjërat të papërfunduara,  përgjysmë: si gjërat materiale – shtëpinë, fustanin e qëndisur me dorë, koleksionin e lodrave – ashtu edhe gjërat abstrakte: dikujt fëmijërinë, dikujt tjetër një histori dashurie, e dikujt tjetër një vëllazëri.

Dhuna ose zgjedhjet e kufizuara të së kaluarës mund t’ju kenë detyruar edhe ty ose familjen tënde të lini diçka përgjysmë. Me ardhjen e paqes ose moshës së pjekurisë, mund të keni provuar t’i riktheheni asaj gjëje, ndonjëherë pa sukses. Ose ndoshta keni zgjedhur ta lini të mbetet përgjysmë, duke e shndërruar atë zgjedhje në një ritual, ndoshta edhe në një formë dëshire.

Mospërfundimi mund të shndërrohet në pendim. Mund të bëhet kujtim dhe forcë. Mund të bëhet edhe një fillim ose një fund. Mund të jetë një dritare në të kaluarën ose në atë që të çon në të ardhmen.

Ne duam t’i dëgjojmë historitë tuaja të lëna përgjysmë dhe, më e rëndësishmja, çfarë domethënie kanë ato për ju. Pavarësisht nëse jeni në Kosovë apo në diasporë, pavarësisht nëse jeni shkrimtar me profesion, nga pasioni apo fare nuk ia keni idenë shkrimit, pavarësisht moshës apo perspektivës suaj, jemi kuriozë për historitë tuaja.

Duam t’u japim atyre hapësirë ​​mes zhurmës së jetës së përditshme. Dhe duam të mësojmë nga ju: komuniteti juaj, interpretimet tuaja, aktet tuaja të kujtesës. Duam të dëgjojmë nga njerëz që mbartin histori migrimi, që përballen me heshtjen për luftën dhe që zgjerojnë njohurinë tonë rreth konfliktit – përtej vetë luftës, drejt formave dhe dimensioneve të shumta të saj.

Duam të dëgjojmë nga kushdo, historia e papërfunduar e të cilit nuk e ka marrë vëmendjen e duhur— ose ndoshta edhe mirëkuptimin — që meriton. Shkruani një artikull prej 900–1,200 fjalësh rreth historisë së papërfunduar që e kujtoni, që e mbani me vete ose që u ka mbetur peng, në gjuhën angleze ose shqipe.

Një artikulli për blog nuk është artikull akademik. Është një shkrim personal ku e ndani perspektivën, historinë ose përvojën tuaj. Për këtë thirrje, blogu juaj mund të jetë reflektues, emocional ose kreativ; nuk ka nevojë të ndjekë rregulla të rrepta.

Si frymëzim, mund t’i keni paraysh këto pyetje:

• Cilat gjëra — materiale apo jomateriale, nga e kaluara juaj apo nga historitë me të cilat jeni rritur — mbeten ende të papërfunduara?
• Çfarë ndjenjash të lindin kur mendon për to? Si i kupton ose u jep kuptim atyre?
• Kur përballesh me historinë e papërfunduar, si e përballon atë – a përpiqesh ta përfundosh, ta lësh ashtu siç është, apo ta transformosh? Pse?
• Si ndikon kjo lënie në gjysmë në jetën që e jetoni sot dhe në të ardhmen që e imagjinoni?
• Çfarë do të dëshironit që të tjerët të mësonin ose të kuptonin nga përvoja juaj e historisë së papërfunduar?

Tekstet e përzgjedhura do të publikohen tek Platforma “Ballafaqimi me të kaluarën”, një hapësirë ​​e dedikuar fushës së kujtesës në Kosovë dhe më gjerë. Përmes kësaj platforme, fjalët tuaja do të qëndrojnë përkrah fjalëve të të tjerëve, duke krijuar lidhje midis përvojave, perspektivave dhe brezave.

Na dërgoni artikullin tuaj me e-mail, tek: luca.teseilibassi@propeace.de deri më 15 mars 2026.

Nëse keni ndonjë pyetje ose keni nevojë për sqarime, mos hezitoni të na kontaktoni në të njëjtën adresë email-i. Autorët, historitë e të cilëve përzgjedhen për botim, do të marrin kompensim dhe mbështetje editoriale.

Për t’u frymëzuar më tej, eksploroni artikujt që i kemi publikuar në seritë tona të mëparshme, me titull Urat e Kujtesës.

Me padurim po i presim edhe historitë tuaja!

Rreth organizatës Pro Peace

Pro Peace u themelua në vitin 1996 nga grupet gjermane të paqes dhe të të drejtave të njeriut si përgjigje ndaj Luftërave Ballkanike, fillimisht nën emrin Forum Civil Peace Service (forumZFD). Sot, organizata punon në 13 vende të Evropës, Lindjes së Mesme dhe Azisë Juglindore. Misioni i saj është t’i forcojë akterët e shoqërisë civile që janë të përkushtuar ndaj paqes dhe jo-dhunës në zona konflikti. Pro Peace këshillon, mbështet dhe bashkëpunon me iniciativat lokale dhe avokon për politika të qëndrueshme paqeje në nivel ndërkombëtar.

Programi i Kosovës

Në Kosovë, Pro Peace përqendrohet në nxitjen e dialogut, ballafaqimin me të kaluarën dhe ndërtimin e qasjeve jo të dhunshme ndaj transformimit të konfliktit. Përmes platformave të tilla si nisma “Ballafaqimi me të kaluarën”, programi vë në pah perspektivat dhe historitë që përndryshe do të mbeteshin të padëgjuara. Duke vepruar kështu, ndihmon në lidhjen e brezave dhe komuniteteve, dhe krijon hapësira për reflektim, shërim dhe pajtim.

Foto kryesore: detaj nga Fjalori Anglisht–Shqip / Ramazan Hysa, EDFA, 2000