(Пре)пишување на историјата на Западен Балкан

Во претходните изданија уредничкиот тим на Балкански.перспективи ви укажа како и зошто историјата во регионот на Западен Балкан се оспорува, се побива и се инструментализира. (Пре)пишувањето на историјата не е неутрален, туку намерен политички процес кој се обидува да утврди реалности и наративи и ги рефлектира односите на моќта во различни временски периоди. Во овој поглед, историскиот ревизионизам и негирање не можат да бидат само нормализирање на моноперспективните историски наративи. Историскиот ревизионизам има потенцијал да изгради подлога што ги побива основните демократски достигнувања, ги оживува авторитарните тенденции и дискредитира иницијативи што го оспоруваат есенцијалниот поглед на идентитетите и општествата преку инструментализација на историските дискурси. Во таквите случаи, создавањето на „НИЕ“ ги придушува гласовите во процесот на клучната историзација на заедничкото минато на сметка на создавањето на „ДРУГИТЕ“.

[expander_maker id=”2″ more=”Read more” less=”Read less”]

Во овој контекст, ова издание на Балкански.перспективи ја дополнува плуралистичката, конструктивна и отворена дискусија за справување со минатото на Западен Балкан. Оваа заложба за мултиперспективен пристап и во теоријата и во практиката е клучен аспект за побивање на историскиот ревизионизам. Тоа го прави преку признавање и препознавање дека историјата е длабоко вкоренета во локалната, во регионалната и во глобалната динамика на политичките, културните и социјалните средини. Тоа е врзано за просторните референци и за хетерогеноста на гласовите на актерите. Така, мултиперспективноста ја отфрла историјата како елитистички проект и го нагласува плурализмот на перспективите и вклучувањето на разновидни и сигурни извори, обидувајќи се да овозможи историографијата да стане алатка за општествени рефлексии и справување со заедничкото минато, поплаките и траумите во земјите од Западен Балкан.

Уредничкиот тим ова издание на Балкански.перспективи го посвети на анализата на историските ревизионистички тенденции на Западен Балкан и ги обедини ставовите за општото сфаќање на ревизионистичките тенденции и пишувањето на историјата во соодветната јавна и приватна сфера.

Ова издание на Балкански.перспективи содржи статии од Хуснија Камберовиќ, Шкелзен Гаши и Миливој Бешлин кои даваат општ поглед на тековните дискусии околу историскиот ревизионизам во Босна и Херцеговина, Косово и Србија. Можете да ја прочитате студијата на случај на Арбер Салиху за новоразвиената програма за холокауст како важна алатка за инклузивна настава по историја во Косово. Лејла Гачаница нè води на обиколка низ интервенциите во јавните простори на Мостар. Сања Петровиќ Тодосијевиќ разгледува како рехабилитацијата на нацистичките колаборатори во Србија дава основа за оспорување на минатото. Марко Кртолица ја истражува промената на перцепцијата за Методија Андонов-Ченто во процесот на градење нација на Северна Македонија во 20 и 21 век, а Наташа Стаменковиќ дава критички осврт на status quo состојбата со усогласувањето на Северна Македонија со регулативите на Меѓународниот кривичен суд (МКС) за поранешна Југославија.

Во име на уредничкиот тим на Балкански.перспективи, сакаме да им се заблагодариме на сите автори за нивниот важен придонес и на сите оние кои ја овозможија оваа публикација. Ви посакуваме пријатно читање со последното издание на Балкански.перспективи за 2020 година, имајте прекрасни празници и среќна Нова година!

Александар Војвода

главен и одговорен уредник

[/expander_maker]